శ్రీ సుబ్రహ్మణ్య షట్కం – Sri Subrahmanya Shatkam

శరణాగతమాతురమాధిజితం
కరుణాకర కామద కామహతమ్ |
శరకాననసంభవ చారురుచే
పరిపాలయ తారకమారక మామ్ || 1 ||

హరసారసముద్భవ హైమవతీ-
-కరపల్లవలాలిత కమ్రతనో |
మురవైరివిరించిముదంబునిధే
పరిపాలయ తారకమారక మామ్ || 2 ||

శరదిందుసమానషడాననయా
సరసీరుహచారువిలోచనయా |
నిరుపాధికయా నిజబాలతయా
పరిపాలయ తారకమారక మామ్ || 3 ||

గిరిజాసుత సాయకభిన్నగిరే
సురసింధుతనూజ సువర్ణరుచే |
శిఖితోకశిఖావలవాహన హే
పరిపాలయ తారకమారక మామ్ || 4 ||

జయ విప్రజనప్రియ వీర నమో
జయ భక్తజనప్రియ భద్ర నమో |
జయ శాఖ విశాఖ కుమార నమః
పరిపాలయ తారకమారక మామ్ || 5 ||

పరితో భవ మే పురతో భవ మే
పథి మే భగవన్ భవ రక్ష గతిమ్ |
వితరాశు జయం విజయం పరితః
పరిపాలయ తారకమారక మామ్ || 6 ||

ఇతి కుక్కుటకేతుమనుస్మరతాం
పఠతామపి షణ్ముఖషట్కమిదమ్ |
భజతామపి నందనమిందుభృతో
న భయం క్వచిదస్తి శరీరభృతామ్ || 7 ||

గాంగేయం వహ్నిగర్భం శరవణజనితం జ్ఞానశక్తిం కుమారం
బ్రహ్మణ్యం స్కందదేవం గుహమచలభిదం రుద్రతేజస్వరూపమ్ |
సేనాన్యం తారకఘ్నం గజముఖసహజం కార్తికేయం షడాస్యం
సుబ్రహ్మణ్యం మయూరధ్వజరథసహితం దేవదేవం నమామి || 8 ||

ఇతి శ్రీసుబ్రహ్మణ్యషట్కమ్ ||